Gedichte
Rommé-Zwiegesang
Komm môl romm,
Komm môl romm,
Komm zom Rommé romm!
Ha I däd, ha I däd,
Ha I däd scho' môl,
Abbr's langt, abbr's langt,
Net vors Deerle naus;
Wenn e komm, wenn e komm,
Komme hoam, wenn e komm?
Komm no romm,
Komm no romm,
Komm zom Rommé romm.
Wenn'e keem, wenn'e keem -
Geeng e nemme hoam,
Romm ond nomm,
Nomm ond romm,
Isch mr obequem!
An Madonna Laura
Du bisch mr oas - du bisch dr Daag,
Wenn e di âgugg ben e blend;
Du bisch mai Naacht - mi drifft dr Schlag:
I kâ et schwätza, wenn I moin I kennt.
Gugg mi et â mit sodde Veigela:
An deine Busa druggt's mi nâ,
Mr brommt's wia dausend Geigela
S'hot mi dai Blitz mit Bleedheit gschlâ.
Ell Daag isch mr dr Daag koan Daag;
Ell Naacht heer I die Geiga bromma
Heb du me uff, heb, was'e draag:
Ond was I bee, lass komma;
Lass komma, Keenigin ond Kend:
Du bisch des Wort, des mi verbrennt!
Sonett über den Widerstand
Kenned`r dees? So laoft`s, wenn er`s läand,
Dia Gsella, den Gaigel- ond Gautscherverai,
Druffnuff, ondadurch ond widdr dren nai
Dia schwätzat ond hätzat ond däand:
Etz se`mr môl päb: etz nemma`mr`s kromm
We`mr`s verdruggd, wo mr Gschiaß macha sott,
Drom liaber dren nai wia selmols dromrom,
Wia dass mr sai Klabb widdr`et uffbrocht hott:
Bei oos isst mr d`Epfel mit Wirm wia mr s` fend
Send se ao fauled ond matsched ond schlecht,
Aierschd wenn`s bitzelt, nô send se ao guad.
Mr hot ao an Meggel ond et bloos zwoi Hend,
Dua du des sell was de saisch, abbr recht:
An Schwôb isch an Schwôb drnôch was`r duad.